ham ne to khud ko bhi miTaa Daalaa — Khalilur Rahman Azmi

bhalaa huaa ki koi aur mil gayaa tum saa
vagarna ham bhi kisi din tumhein bhulaa dete

nikaale gae is ke maani hazaar
ajab chiiz thi ik miri khaamushi

dekhne vaalaa koi mile to dil ke daagh dikhaaun
ye nagri andhon ki nagri kis ko kyaa samjhaaun

ye tamannaa nahin ab daad-e-hunar de koi
aa ke mujh ko mire hone ki khabar de koi

haae vo log jin ke aane kaa
hashr tak intizaar hotaa hai

yuun to marne ke liye zahr sabhi piite hain
zindagi tere liye zahr piyaa hai main ne

bhaTak ke raah se ham sab ko aazmaa aae
fareb de gae jitne bhi rahnumaa aae

mohmal hai na jaanein to, samjhein to vazaahat hai
hai ziist faqat dhokaa aur maut haqiqat hai

mujhi ko parda-e-hasti mein de rahaa hai fareb
vo husn jis ko kiyaa jalva-aafrin main ne

sar jhukaaoge to patthar devtaa ho jaaegaa
itnaa mat chaaho use vo bevafaa ho jaaegaa

fareb-e-ahd-e-mohabbat ki saadgi ki qasam
vo jhuuT bol ki sach ko bhi pyaar aa jaae

in vafaadaari ke vaadon ko ilaahi kyaa huaa
vo vafaaein karne vaale bevafaa kyuun ho gae