haae vo log jin ke aane kaa — Khalilur Rahman Azmi

bhalaa huaa ki koi aur mil gayaa tum saa
vagarna ham bhi kisi din tumhein bhulaa dete

nikaale gae is ke maani hazaar
ajab chiiz thi ik miri khaamushi

ham ne to khud ko bhi miTaa Daalaa
tum ne to sirf bevafaai ki

dekhne vaalaa koi mile to dil ke daagh dikhaaun
ye nagri andhon ki nagri kis ko kyaa samjhaaun

ye tamannaa nahin ab daad-e-hunar de koi
aa ke mujh ko mire hone ki khabar de koi

yuun to marne ke liye zahr sabhi piite hain
zindagi tere liye zahr piyaa hai main ne

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

is havaa mein kar rahe hain ham tiraa hi intizaar
aa kahin jaldi se saaqi shisha o saaghar samet

ishq kachche ghaDe pe Duub gayaa
lamha jab intizaar kaa aayaa

intizaar aur dastakon ke darmiyaan kaTti hai umr
itni aasaani se to baab-e-hunar khultaa nahin

yaqin chaand pe suraj mein e'tibaar bhi rakh
magar nigaah mein thoDaa saa intizaar bhi rakh