jaam-ba-dast-o-mai-ba-jaam yuun hi guzaar subh-o-shaam — Khumar Barabankavi

gham hai na ab khushi hai na ummid hai na yaas
sab se najaat paae zamaane guzar gae

na to hosh se taaaruf na junun se aashnaai
ye kahaan pahunch gae hain tiri bazm se nikal ke

ye kahnaa thaa un se mohabbat hai mujh ko
ye kahne mein mujh ko zamaane lage hain

phuul kar le nibaah kaanTon se
aadmi hi na aadmi se mile

vo kaanTaa hai jo chubh kar TuuT jaae
mohabbat ki bas itni daastaan hai

ham pe guzraa hai vo bhi vaqt 'khumaar'
jab shanaasaa bhi ajnabi se mile

kaash sotaa hi rahun main ki nahin chaahtaa dil
har sahar uTh ke rukh-e-gabr-o-musalmaan dekhun

aati hai yaad subh-e-masarrat ki baar baar
khurshid aate aate use kal uThaa to laa

ham siin maston ko bas hai teri nigaah
subh uTh kar khumaar ki khaatir

roza rakhtaa huun subuhi pi ke hangaam-e-sahar
shaam ko masjid mein hotaa huun jamaaat kaa sharik

haan dikhaa de ai tasavvur phir vo subh o shaam tu
dauD pichhe ki taraf ai gardish-e-ayyaam tu

ik ham ki ham ko subh se hai shaam ki khushi
ik tum ki tum ko shaam kaa dhaDkaa sahar se hai