jo tamaam umr rahaa sabab ki talaash mein — Khursheed Rizvi

is e'tiraaf se ras ghul rahaa hai kaanon mein
vo e'tiraaf jo us ne abhi kiyaa bhi nahin

bas dariche se lage baiThe rahe ahl-e-safar
sabza jaltaa rahaa aur yaad-e-vatan aati rahi

maut ki ek alaamat hai agar dekhaa jaae
ruuh kaa chaar anaasir pe savaari karnaa

ham teri tabiat ko 'khurshid' nahin samjhe
patthar nazar aataa thaa royaa to bahut royaa

aasaan to nahin apni hasti se guzar jaanaa
utraa jo samundar mein dariyaa to bahut royaa

jo shakhs na royaa thaa tapti hui raahon mein
divaar ke saae mein baiThaa to bahut royaa

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

bachchon ke haath mein bhalaa dete hain aisi chiiz
dekho kharaab ho gai mujh se ye zindagi

qata hoti jaa rahi hain zindagi ki manzilein
har nafs apni jagah chalti hui talvaar hai

koThe ujaaD khiDkiyaan chup raaste udaas
jaate hi un ke kuchh na rahaa zindagi ke paas