kis ki khaatir ujaaD raste par — Khurshid Rabbani

dekh kar bhi na dekhnaa us kaa
ye adaa to buton mein hoti hai

kisi ne meri taraf dekhnaa na thaa 'khurshid'
to be-sabab hi sanvaaraa gayaa thaa kyuun mujh ko

koi nahin jo miTaae miri siyah-bakhti
falak pe kitne sitaare hain jagmagaae hue

tiraa bakhshaa huaa ik zakhm pyaare
chali ThanDi havaa jalne lagaa hai

havaa-e-taaza kaa jhonkaa idhar se kyaa guzraa
gire paDe hue patton mein jaan aa gai hai

khvaabon ki main ne ek imaarat banaai aur
yaadon kaa us mein ek daricha banaa liyaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gul kiyaa jis ne vo thaa aur magar
shama ne shikva havaaon se kiyaa

kahaan milegi misaal meri sitamgari ki
ki main gulaabon ke zakhm kaanTon se si rahaa huun

mujh ko bhi pahle-pahal achchhe lage the ye gulaab
Tahniyaan jhukti huiin aur titliyaan uDti huiin

jo ahl-e-zauq hain vo lutf uThaa lete hain chal phir kar
gulistaan kaa gulistaan mein bayaabaan kaa bayaabaan mein