dushmanon ko dost bhaai ko sitamgar kah diyaa — Laiq Aajiz

vo dhuup thi ki zamin jal ke raakh ho jaati
baras ke ab ke baDaa kaam kar gayaa paani

qalam uThaaun ki bachchon ki zindagi dekhun
paDaa huaa hai doraahe pe ab hunar meraa

khetiyaan chhaalon ki hoti thiin lahu ugte the
kitnaa zarkhez thaa vo dar-badari kaa mausam

ai mire paanv ke chhaalo mire ham-raah raho
imtihaan sakht hai tum chhoD ke jaate kyuun ho

mein chaahtaa huun ta'alluq ke darmiyaan parda
vo chaahtaa hai mire haal par nazar karnaa

shaam hote hi bujh gayaa 'aajiz'
ek muflis kaa khvaab thaa na rahaa

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

jab ki pahlu se yaar uThtaa hai
dard be-ikhtiyaar uThtaa hai

barseingi aaj rahmatein aamad hai yaar ki
naayaab hain ye ghaDiyaan tire intizaar ki

yahi to ek tamannaa hai is musaafir ki
jo tum nahin to safar mein tumhaaraa pyaar chale

kyaa puchhte ho naam-o-nishaan-e-musaafiraan
hindostaan mein aae hain hindostaan ke the

kise dost apnaa banaaein ham kise dil kaa haal sunaaein ham
sabhi ghair hain sabhi ajnabi tire gaanv mein mire shahr mein