ai mire paanv ke chhaalo mire ham-raah raho — Laiq Aajiz

vo dhuup thi ki zamin jal ke raakh ho jaati
baras ke ab ke baDaa kaam kar gayaa paani

qalam uThaaun ki bachchon ki zindagi dekhun
paDaa huaa hai doraahe pe ab hunar meraa

khetiyaan chhaalon ki hoti thiin lahu ugte the
kitnaa zarkhez thaa vo dar-badari kaa mausam

dushmanon ko dost bhaai ko sitamgar kah diyaa
log kyuun barham hain kyaa shishe ko patthar kah diyaa

mein chaahtaa huun ta'alluq ke darmiyaan parda
vo chaahtaa hai mire haal par nazar karnaa

shaam hote hi bujh gayaa 'aajiz'
ek muflis kaa khvaab thaa na rahaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

kuchh log the safar mein magar ham-zabaan na the
hai lutf guftugu kaa jo apni zabaan mein ho