baarish jise 'mahmud' samajhtaa hai zamaana — Mahmood Ahmad Hashmi

zulm bhi sharmaa rahaa hai adl ki mizaan se
kuud jaanaa chaahiye minaar-e-paakistaan se

aisaa kahaan ye zaaiqa gandum ke paas hai
roTi mein maan ke haath ki shaamil miThaas hai

miri vafaa mein kami hai to mujh se baat kare
use kaho ki vo aae muzaakaraat kare

raae kyaa qaaem kareinge ajnabi us shahr mein
rasta batlaae jahaan par ek andhaa aadmi

pahle soyaa kartaa thaa 'mahmud' lambi taan kar
phir shuur aataa gayaa aur ratjage baDhte gae

miri tarah se shajar bhi hain baaghiyaana mizaaj
jahaan se kaaTe gae the vahin se ug aae

pyaaso raho na dasht mein baarish ke muntazir
maaro zamin pe paanv ki paani nikal paDe

abr-e-aavaara se mujh ko hai vafaa ki ummid
barq-e-betaab se shikva hai ki paainda nahin

is bulandi pe bahut tanhaa huun
kaash main sab ke baraabar hotaa

main ki kaaghaz ki ek kashti huun
pahli baarish hi aakhiri hai mujhe

bataa ai abr musaavaat kyuun nahin kartaa
hamaare gaanv mein barsaat kyuun nahin kartaa

koi kamre mein aag taaptaa ho
koi baarish mein bhigtaa rah jaae