us ko aavaaz do mohabbat se — Mahtab Alam

ye san kar meri nindein uD gai hain
koi meraa bhi sapnaa dekhtaa hai

aansuon ke jahaan mein rahte hain
ham isi kahkashaan mein rahte hain

zehn aise bhi na ban jaaein nisaabon vaale
guftugu mein bhi huun alfaaz kitaabon vaale

ik safar phir mari taqdir huaa jaataa hai
raasta paanv ki zanjir huaa jaataa hai

naaqido tum to mire fan ki parakh rahne do
apne sone ko main pital nahin hone dungaa

bane hain kitne chehre chaand suraj
ghazal ke istiaaraati ufuq par

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

vaqt ne sab bhulaa diyaa 'partav'
ishq kyaa shai hai aashiqi kyaa hai

yuun samajhiye ghazal mukammal hai
jab mohabbat baghal mein baiThi ho

ham sahraa vaale hain badraa ye prem ki rim-jhim aur kahin
aanaa hai yahaan to aaiyo tu jam kar jham-jham karne ke liye