'majruh' likh rahe hain vo ahl-e-vafaa kaa naam — Majrooh Sultanpuri

dast-e-pur-khun ko kaf-e-dast-e-nigaaraan samjhe
qatl-gah thi jise ham mahfil-e-yaaraan samjhe

main ki ek mehnat-kash main ki tirgi-dushman
subh-e-nau ibaarat hai mere muskuraane se

tishnagi hi tishnagi hai kis ko kahiye mai-kada
lab hi lab ham ne to dekhe kis ko paimaana kahein

paara-e-dil hai vatan ki sarzamin mushkil ye hai
shahr ko viraan yaa is dil ko viraana kahein

be-tesha-e-nazar na chalo raah-e-raftagaan
har naqsh-e-paa buland hai divaar ki tarah

bahaane aur bhi hote jo zindagi ke liye
ham ek baar tiri aarzu bhi kho dete

mire naakhudaa na ghabraa ye nazar hai apni apni
tire saamne hai tufaan mire saamne kinaaraa

yaqin mujhe bhi hai vo aaeinge zarur magar
vafaa karegi kahaan tak ki zindagi hi to hai

ai khaak-e-vatan ab to vafaaon kaa silaa de
main TuTti saanson ki fasilon pe khaDaa huun

ye dil ye shahr-e-vafaa kab use pasand aayaa
vo be-qaraar thaa us ko yahaan se jaanaa thaa

na tasalli na tashaffi na dilaasaa na vafaa
umr ko kaaTein tire chaahne vaale kyun-kar

is shart pe baandhaa thaa ik ahd-e-vafaa main ne
jo sukh hain vo tere hain jo dukh hain vo mere hain