dast-e-pur-khun ko kaf-e-dast-e-nigaaraan samjhe — Majrooh Sultanpuri

'majruh' likh rahe hain vo ahl-e-vafaa kaa naam
ham bhi khaDe hue hain gunahgaar ki tarah

main ki ek mehnat-kash main ki tirgi-dushman
subh-e-nau ibaarat hai mere muskuraane se

tishnagi hi tishnagi hai kis ko kahiye mai-kada
lab hi lab ham ne to dekhe kis ko paimaana kahein

paara-e-dil hai vatan ki sarzamin mushkil ye hai
shahr ko viraan yaa is dil ko viraana kahein

be-tesha-e-nazar na chalo raah-e-raftagaan
har naqsh-e-paa buland hai divaar ki tarah

bahaane aur bhi hote jo zindagi ke liye
ham ek baar tiri aarzu bhi kho dete

jab ki pahlu se yaar uThtaa hai
dard be-ikhtiyaar uThtaa hai

samajh liyaa thaa tujhe dost ham ne dhoke mein
so aaj se tujhe baar-e-digar samajhte hain

sab doston se mujh ko ziyaada 'aziz hai
aisaa bhi ek shakhs mire dushmanon mein hai

meri to jaan hi nikal gai jab
dost kah kar mujhe pukaaraa gayaa

zindagi jis ne talkh ki meri
vo mujhe zindagi se pyaaraa hai

abhi to mansab-e-hasti se main haTaa hi nahin
badal gae hain mire doston ke lahje bhi