main vo sahraa jise paani ki havas le Duubi — Sultan Akhtar

ik khauf-e-be-panaah hai aankhon ke aar-paar
taarikiyon mein Dubtaa lamha hai saamne

safar safar mire qadmon se jagmagaayaa huaa
taraf taraf hai miri khaak-e-justuju raushan

fursat mein rahaa karte hain fursat se zyaada
masruf hain ham log zarurat se zyaada

hamaari saada-mizaaji pe rashk karte hain
vo saada-posh jo be-intihaa rangile hain

saamne aankhon ke phir yakh-basta manzar aaegaa
dhuup jam jaaegi aangan mein december aaegaa

sab ke honTon pe munavvar hain hamaare qisse
aur ham apni kahaani bhi nahin jaante hain

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

apne ajdaad ki dastaar ko dekhaa aur phir
kar liyaa dil ki tamanna se kinaara main ne

dilon kaa haal to ye hai ki rabt hai na gurez
mohabbatein to gaiin thi adaavatein bhi gaiin

bujh rahe hain charaagh-e-dair-o-haram
dil jalaao ki raushni kam hai