charaagh-haa-e-takalluf bujhaa diye gae hain — Meer Ahmad Naved

zakhm-e-talaash mein hai nihaan marham-e-dalil
tu apnaa dil na haar mohabbat bahaal rakh

mumkin nahin hai shaayad donon kaa saath rahnaa
teri khabar jab aai apni khabar gai hai

khud se guzre to qayaamat se guzar jaaeinge ham
yaani har haal ki haalat se guzar jaaeinge ham

pesh-e-zamin rahun ki pas-e-aasmaan rahun
rahtaa huun apne saath main chaahe jahaan rahun

ai khalish bol kyaa yahi hai khudaa
ye jo dil mein khalaa saa rahtaa hai

kuchh is tarah se kahaa mujh se baiThne ke liye
ki jaise bazm se us ne uThaa diyaa hai mujhe

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

ye arsh se aanaa to aaghaaz-e-mohabbat thaa
ab farsh pe aae hain anjaam se kheleinge

kyaa khabar thi is qadar pur-kaif naghme hain nihaan
zindagi ko ek saaz-e-be-sadaa samjhaa thaa main

zakhm-e-tanhaai mein khushbu-e-hinaa kis ki thi
saaya divaar pe meraa thaa sadaa kis ki thi

sharaab-e-mohabbat ko ai zaahido tum
buraa gar kahoge to achchhaa na hogaa