ai khalish bol kyaa yahi hai khudaa — Meer Ahmad Naved

zakhm-e-talaash mein hai nihaan marham-e-dalil
tu apnaa dil na haar mohabbat bahaal rakh

mumkin nahin hai shaayad donon kaa saath rahnaa
teri khabar jab aai apni khabar gai hai

charaagh-haa-e-takalluf bujhaa diye gae hain
uThaao jaam ki parde uThaa diye gae hain

khud se guzre to qayaamat se guzar jaaeinge ham
yaani har haal ki haalat se guzar jaaeinge ham

pesh-e-zamin rahun ki pas-e-aasmaan rahun
rahtaa huun apne saath main chaahe jahaan rahun

kuchh is tarah se kahaa mujh se baiThne ke liye
ki jaise bazm se us ne uThaa diyaa hai mujhe

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

nahin aisaa bhi ki yaksar nahin rahne vaalaa
dil mein ye shor baraabar nahin rahne vaalaa

kuchh mere dhaDakte hue dil ne bhi pukaaraa
kuchh aap ko baazaar mein dhokaa bhi huaa hai

hasraton kaa ho gayaa hai is qadar dil mein hujum
saans rasta DhunDhti hai aane jaane ke liye

dil us kaa jigar us kaa hai jaan us ki ham us ke
kis baat se inkaar kiyaa jaae kisi ko