karim jo tujhe denaa hai be-talab de de — Meer Anees

khaak se hai khaak ko ulfat taDaptaa huun 'anis'
karbalaa ke vaaste main karbalaa mere liye

'anis' dam kaa bharosaa nahin Thahar jaao
charaagh le ke kahaan saamne havaa ke chale

aashiq ko dekhte hain dupaTTe ko taan kar
dete hain ham ko sharbat-e-didaar chhaan kar

tamaam umr jo ki ham se be-rukhi sab ne
kafan mein ham bhi azizon se munh chhupaa ke chale

'anis' aasaan nahin aabaad karnaa ghar mohabbat kaa
ye un kaa kaam hai jo zindagi barbaad karte hain

sivaae khaak ke baaqi asar nishaan se na the
zamin se dab gae dabte jo aasmaan se na the

ye samajh kar faqiri hi mein hai khudaa
gun hamesha faqiron ke gaate rahe

qaasidaa ham faqir logon kaa
ik Thikaana nahin ki tujh se kahein

ho gayaa huun main naqaab-e-ru-e-raushan par faqir
chaahiye tah-band mujh ko chaadar-e-mahtaab kaa

hain vo suufi jo kabhi naalaa-e-naaqus sunaa
vajd karne lage ham dil kaa ajab haal huaa

darvesh nazar aataa thaa har haal mein lekin
'saajid' ne libaas itnaa bhi saada nahin pahnaa

tere khush-posh faqiron se vo milte to sahi
jo ye kahte hain vafaa pairhan-e-chaak mein hai