'aql aur 'ishq laDte rahe der tak — Mehshar Afridi

zamin par ghar banaayaa hai magar jannat mein rahte hain
hamaari khush-nasibi hai ki ham bhaarat mein rahte hain

vo kuchh ghalat nahin thaa hamin bevaquf the
shishe ko saaf karte rahe is taraf se ham

jab tumhaari ye maatami aankhein
muskuraati hain shor thamtaa hai

visaal-e-yaar furqaton ki rut badal nahin rahaa
badan qaraar paa gayaa hai dil sanbhal nahin rahaa

tumhaare husn ko kab tak varaq varaq paDhte
so ek raat mein puuri kitaab paDh Daali

zaraa baahon ke halqe aur kas lo
mohabbat saans lenaa chaahti hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

raas aae tum ko mulk-e-ishq ki aab-o-havaa
aashiqo har-vaqt shaghl-e-aah-o-zaari chaahiye

chalo ham bhi vafaa se baaz aae
mohabbat koi majburi nahin hai

'aql kuchh kaam ki na thi 'asraar'
'ishq ne is ko Thiik Thaak kiyaa

tum ko chaahein bhi aur ghair ke saath bhi dekhein
tum kyaa jaano ishq ki kyaa kyaa laachaari hai