sikhlaa rahaa huun dil ko mohabbat ke rang-Dhang — Mirza Maseeta Beg Muntahi

khud rahm kijiye dil-e-ummid-vaar par
aaphi nikaaliye koi surat nibaah ki

tere baazaar-e-dahr mein gardun
ham bhi aae hain ik qabaa ke liye

jalaa kar zaahidon ko mai-kashon ko shaad karte hain
giraa kar masjidon ko mai-kade aabaad karte hain

piiri hui shabaab se utraa jhaTak gayaa
shaaer huun meraa misra-e-saani laTak gayaa

baad marne ke Thikaane lag gai miTTi miri
khaak se aashiq ki kyaa kyaa yaar ke saaghar bane

tohmat-e-jurm-o-khataa hirs-o-havaa ghaflat-e-dil
ham ne baazaar se hasti ke liyaa kyaa kyaa kuchh

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

vo bhi hamaare naam se begaane ho gae
ham ko bhi sach hai un se mohabbat nahin rahi

aisaa nahin ki un se mohabbat na ho magar
pahle saa josh pahle si shiddat nahin rahi

mohabbat to kisi se kar na paae
kisi se tum shikaayat kyaa karoge

mohabbat ki bhi kyaa hotin nahin ai ham-nashin raahein
ki khubaan yuun hamein dukh dein, ham un ko is tarah chaahein