aaj phir mujh se kahaa dariyaa ne — Mohammad Alvi

main us ke badan ki muqaddas kitaab
nihaayat aqidat se paDhtaa rahaa

kamre mein maze ki raushni ho
achchhi si koi kitaab dekhun

nayaa saal divaar par Taang de
puraane baras kaa calendar giraa

aur baazaar se kyaa le jaaun
pahli baarish kaa mazaa le jaaun

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

us se bichhaDte vaqt main royaa thaa khub-saa
ye baat yaad aai to pahron hansaa kiyaa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

band ho jaataa hai kuuze mein kabhi dariyaa bhi
aur kabhi qatra samundar mein badal jaataa hai

naav na Duubi dariyaa mein
naav mein dariyaa Duub gayaa

zabt-e-gham kaa mire andaaza bhalaa kyaa hotaa
main agar dasht na hotaa bhi to dariyaa hotaa

ye soch ke daanista rahaa us se bahut duur
maghrur hai dariyaa mujhe pyaasaa na samajh le

aasaan to nahin apni hasti se guzar jaanaa
utraa jo samundar mein dariyaa to bahut royaa