afsaana dard-o-gham kaa sunaayaa na jaaegaa — Mohammad Daood Mohsin

kaun apnaa hai yahaan kaun paraayaa kahiye
kaun detaa hai bhalaa dukh mein sahaaraa kahiye

main chaahtaa huun tumhein apni zindagi ki tarah
mire vajud pe chhaa jaao chaandni ki tarah

har ek shaam sanvar jaaegi miri 'mohsin'
har ek baat tumhaari hai shaairi ki tarah

itne fareb khaae hain qurbat mein yaar ki
'mohsin' fareb aur bhi khaayaa na jaaegaa

nahin hai paas kisi kaa kisi ko ai 'mohsin'
ki aazmaa ki unhein baar baar dekhaa hai

zindagi TuuT ke bikhri hai sar-e-raah abhi
haadisa kahiye ise yaa ki tamaashaa kahiye

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

aansu hamaaraa us ki hatheli pe aa gayaa
shahzaada aaj apni haveli pe aa gayaa

aaj rukhsat ho gayaa duniyaa se ik bimaar-e-gham
dard aisaa dil mein uTThaa jaan le kar hi gayaa