kaash koi ham se bhi puchhe — Mohsin Naqvi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

vo aksar din mein bachchon ko sulaa deti hai is Dar se
gali mein phir khilaune bechne vaalaa na aa jaae

Dhalte suraj ki tamaazat ne bikhar kar dekhaa
sar-kashida miraa saayaa saf-e-ashjaar ke biich

kal thake-haare parindon ne nasihat ki mujhe
shaam Dhal jaae to 'mohsin' tum bhi ghar jaayaa karo

sunaa hai shahar mein zakhmi dilon kaa mela hai
chaleinge ham bhi magar pairahan rafu kar ke

ab tak miri yaadon se miTaae nahin miTtaa
bhigi hui ik shaam kaa manzar tiri aankhein

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

tabaah ho ke haqaaeq ke khurdure-pan se
tasavvuraat ki taamir kar rahaa huun main

din taal baajtaa hai hoti hai jab savaari
lashkar mein raag shab kuun unTon kaa hai uDaanaa

ek aaina ru-ba-ru hai abhi
us ki khushbu se guftugu hai abhi