ilaaj us kaa guzar jaanaa hai jaan se — Anjum Azmi

tujh se parda nahin mire gham kaa
tu miri zindagi kaa mahram hai

koi to khair kaa pahlu bhi nikle
akelaa kis tarah ye shar rahegaa

biThaa ke saamne tum ko bahaar mein pi hai
tumhaare rind ne tauba bhi ru-ba-ru kar li

ab na vo josh-e-vafaa hai na vo andaaz-e-talab
ab bhi lekin tire kuche se guzar hotaa hai

niklo bhi kabhi sud-o-ziyaan se varna
kuche mein tire kaun bhalaa aaegaa

dil na kaaba hai ne kalisaa hai
teraa ghar hai harim-e-mariyam hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

ghurur bhi jo karun main to aajizi ho jaae
khudi mein lutf vo aae ki be-khudi ho jaae

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai