khair saaqi ki salaamat mai-kada — Mubarak Azimabadi

dil lagaate hi to kah deti hain aankhein sab kuchh
aise kaamon ke bhi aaghaaz kahin chhupte hain

kuchh is andaaz se sayyaad ne aazaad kiyaa
jo chale chhuT ke qafas se vo giraftaar chale

tiri adaa ki qasam hai tiri adaa ke sivaa
pasand aur kisi ki hamein adaa na hui

tum ko samjhaae 'mubaarak' koi kyunkar afsos
tum to rone lage yaar aur bhi samjhaane se

miri khaak bhi uDegi baa-adab tiri gali mein
tire aastaan se unchaa na miraa ghubaar hogaa

rahne de apni bandagi zaahid
be-mohabbat khudaa nahin miltaa

jab ki pahlu se yaar uThtaa hai
dard be-ikhtiyaar uThtaa hai

dil mein zauq-e-vasl o yaad-e-yaar tak baaqi nahin
aag is ghar mein lagi aisi ki jo thaa jal gayaa

baiThaa hai jo ki saaya-e-divaar-e-yaar mein
farmaan-ravaa-e-kishvar-e-hindustaan hai

ghair ho koi to us se khul ke baatein kijiye
doston kaa doston se hi gila achchhaa nahin

dair-o-haram pukaarne aae hamein magar
lekin khayaal-e-yaar se fursat nahin mili

urdu hai jis kaa naam hamaari zabaan hai
duniyaa ki har zabaan se pyaari zabaan hai