ab kunj-e-lahad mein huun mayassar nahin aansu — Munawwr Badayuni

nazar aati hain su-e-asmaan kabhi bijliyaan kabhi aandhiyaan
kahin jal na jaae ye aashiyaan kahin uD na jaaein ye chaar par

ilaaj ki nahin haajat dil-o-jigar ke liye
bas ik nazar tiri kaafi hai umr-bhar ke liye

jo dil ko de gai ik dard umr-bhar ke liye
taDap rahaa huun abhi tak main us nazar ke liye

pichhe muD muD kar na dekho ai 'munavaar' baDh chalo
shahr mein ahbaab to kam hain sage bhaai bahut

'munavaar' main ne jab dil par nazar ki
munavvar ik charaagh-e-tur dekhaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

saari duniyaa ke masaail yuun mujhe darpesh hain
teraa gham kaafi na ho jaise guzar-auqaat ko

udaas chhoD gae kashtiyon ko saahil par
gilaa karein bhi to kyaa paar utarne vaalon se

aks-e-yaad-e-yaar ko dhundlaa kiyaa hai
main ne khud ko jaan kar tanhaa kiyaa hai