jo dil ko de gai ik dard umr-bhar ke liye — Munawwr Badayuni

nazar aati hain su-e-asmaan kabhi bijliyaan kabhi aandhiyaan
kahin jal na jaae ye aashiyaan kahin uD na jaaein ye chaar par

ilaaj ki nahin haajat dil-o-jigar ke liye
bas ik nazar tiri kaafi hai umr-bhar ke liye

pichhe muD muD kar na dekho ai 'munavaar' baDh chalo
shahr mein ahbaab to kam hain sage bhaai bahut

ab kunj-e-lahad mein huun mayassar nahin aansu
aayaa hai shab-e-hijr kaa ronaa mire aage

'munavaar' main ne jab dil par nazar ki
munavvar ik charaagh-e-tur dekhaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

is tarah rahbar ne luuTaa kaarvaan
ai 'fanaa' rahzan ko bhi sadma huaa

phulon ki taazgi mein udaasi hai shaam ki
saae ghamon ke itne to gahre kabhi na the

khaDaa huaa huun sar-e-raah muntazir kab se
ki koi guzre to gham kaa ye bojh uThvaa de