dekhnaa kam-nigahi kijiyo mat ai saaqi — Mushafi Ghulam Hamdani

ham bhi ai jaan-e-man itne to nahin naakaara
kabhi kuchh kaam tu ham ko bhi to farmaayaa kar

jitnaa ki ye duniyaa mein hamein khvaar rakhe hai
itne to gunahgaar zamaane ke nahin ham

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

lailaa chali thi haj ke liye jazb-e-ishq se
naaqa machal ke najd ki manzil mein rah gayaa

apni to is chaman mein nit umr yunhi guzri
yaan aashiyaan banaayaa vaan aashiyaan banaayaa

pichhaa kisi tarah ye miraa chhoDtaa nahin
haathon se ishq ke koi jaave kahaan nikal

pyaaso raho na dasht mein baarish ke muntazir
maaro zamin pe paanv ki paani nikal paDe

hain pattharon ki zad pe tumhaari gali mein ham
kyaa aae the yahaan isi barsaat ke liye

tire abru-e-pevasta kaa aalam mein fasaana hai
kisi ustaad shaaer kaa ye bait-e-aashiqaana hai

un ko yaan vaade pe aa lene de ai abr-e-bahaar
jis qadar chaahnaa phir baad mein barsaa karnaa

uTThaa jo abr dil ki umangein chamak uThin
lahraain bijliyaan to main lahraa ke pi gayaa

main subh khvaab se jaagaa to ye khayaal aayaa
jo raat mere baraabar thaa kyaa huaa us kaa