vo ik tilism thaa qurbat mein us ke umr kaTi — Mustafa Zaidi

inhin pattharon pe chal kar agar aa sako to aao
mire ghar ke raaste mein koi kahkashaan nahin hai

dil ke rishte ajiib rishte hain
saans lene se TuuT jaate hain

main usi koh-sifat khuun ki ik buund huun jo
reg-zaar-e-najaf o khaak-e-khuraasaan se milaa

aankh jhuk jaati hai jab band-e-qabaa khulte hain
tujh mein uThte hue khurshid ki uryaani hai

ham anjuman mein sab ki taraf dekhte rahe
apni tarah se koi akelaa nahin milaa

aandhi chali to naqsh-e-kaf-e-paa nahin milaa
dil jis se mil gayaa vo dobaaraa nahin milaa

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

ye umr bhar kaa safar hai isi sahaare par
ki vo khaDaa hai abhi dusre kinaare par

vo gham ho yaa alam ho dard ho yaa aalam-e-vahshat
use apnaa samajh ai zindagi jo tere kaam aae

maatam-e-marg-e-tamannaa na samajh ai naadaan
zindagi bol rahi hai mire afsaane mein