us ne mujh ko yaad farmaayaa yaqinan — Muzaffar Hanfi

aangan mein ye raat ki raani saanpon kaa ghar kaaT ise
kamra albatta suunaa hai kone mein guldaan lagaa

roti hui ek bhiiD mire gird khaDi thi
shaayad ye tamaasha mire hansne ke liye thaa

shukriya reshmi dilaase kaa
tiir to aap ne bhi maaraa thaa

bachpan mein aakaash ko chhutaa saa lagtaa thaa
is pipal ki shaakhein ab kitni nichi hain

bataaein kyaa ki bechaini baDhaate hain vahi aa kar
bahut bechain ham jin ke liye maalum hote hain

bheDiye aur ishtiraak-shudaa
biich mein ik hiran halaak-shudaa

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

main jab bhuke parinde dekhtaa huun apne aangan mein
mujhe apne vatan ke nange bachche yaad aate hain

nahin hai jis kaa hal ab to koi 'nadim' bas ik sivaa tumhaare
main ek aisaa hi masala huun mujhe duaaon mein yaad rakhnaa

ai mire dost mire saath tiri yaadon ki
ret itni hai huaa jaataa hai sahraa chehra

shab kitni bojhal bojhal hai ham tanhaa tanhaa baiThe hain
aise mein tumhaari yaad aai jis tarah koi ilhaam aae