uThe uTh kar chale chal kar thame tham kar kahaa hogaa — Muztar Khairabadi

zulf ko kyuun jakaD ke baandhaa hai
us ne bosa liyaa thaa gaal kaa kyaa

mire dil ne jhaTke uThaae hain kitne ye tum apni zulfon ke baalon se puchho
kaleje ki choTon ko main kyaa bataaun ye chhaati pe lahraane vaalon se puchho

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

un kaa ik patlaa saa khanjar un kaa ik naazuk saa haath
vo to ye kahiye miri gardan khushi mein kaT gai

ai buto ranj ke saathi ho na aaraam ke tum
kaam hi jab nahin aate ho to kis kaam ke tum

mohabbat mein kisi ne sar paTakne kaa sabab puchhaa
to kah dungaa ki apni mushkilein aasaan kartaa huun

na tum hosh mein ho na ham hosh mein hain
chalo mai-kade mein vahin baat hogi

sau fasaad ek ishq mein uTThe
boyaa ik tukhm uge hazaar darakht

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

mujh tak kab un ki bazm mein aataa thaa daur-e-jaam
saaqi ne kuchh milaa na diyaa ho sharaab mein

na gul khile hain na un se mile na mai pi hai
ajiib rang mein ab ke bahaar guzri hai

koi saaghar pe saaghar pi rahaa hai koi tishna hai
murattab is tarah aain-e-mai-khaana nahin hotaa