yaad karnaa hi ham ko yaad rahaa — Muztar Khairabadi

ik sadma-e-mohabbat ik sadma-e-judaai
ginti ke do hain lekin laakhon ki jaan par hain

un kaa ik patlaa saa khanjar un kaa ik naazuk saa haath
vo to ye kahiye miri gardan khushi mein kaT gai

tum agar chaaho to miTTi se abhi paidaa hon phuul
main agar maangun to dariyaa bhi na de paani mujhe

zulf ko kyuun jakaD ke baandhaa hai
us ne bosa liyaa thaa gaal kaa kyaa

mire dil ne jhaTke uThaae hain kitne ye tum apni zulfon ke baalon se puchho
kaleje ki choTon ko main kyaa bataaun ye chhaati pe lahraane vaalon se puchho

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

mere khvaabon ke jharokon ko sajaate rahiye
na sahi vasl magar yaad to aate rahiye

vo mil na sake yaad to hai un ki salaamat
is yaad se bhi ham ne bahut kaam liyaa hai

aise mar jaaein koi naqsh na chhoDein apnaa
yaad dil mein na ho akhbaar mein tasvir na ho

bhuul jaanaa thaa jise sabt hai dil par mere
yaad rakhnaa thaa jise us ko bhulaa baiThaa huun

shaam paDe so jaane vaalaa! diip bujhaa kar yaadon ke
raat gae tak jaag rahaa thaa pahli pahli baarish mein

mausam-e-yaad kaa koi jhonkaa, ab jo guzre tumhaari khalvat se
soch lenaa hamaare baare mein, par hamaaraa malaal mat karnaa