aise mar jaaein koi naqsh na chhoDein apnaa — Khaleel Mamoon

hazaaron chaand sitaare chamak gae hote
kabhi nazar jo tiri maail-e-karam hoti

meri tarah se ye bhi sataayaa huaa hai kyaa
kyuun itne daagh dikhte hain mahtaab mein abhi

sab log hamein ek nazar aate hain
andaaza nahin hotaa hai ab chehron kaa

aisaa ho zindagi mein koi khvaab hi na ho
andhiyaari raat mein koi mahtaab hi na ho

tum nahin aaoge khabar hai hamein
phir bhi ham intizaar kar leinge

vo buraai sab se meri kar rahe hain
kyuun nahin karte bayaan achchhaaiyon ko

mere khvaabon ke jharokon ko sajaate rahiye
na sahi vasl magar yaad to aate rahiye

hasin yaadon ke chaand ko alvidaaa kah kar
main apne ghar ke andhere kamron mein lauT aayaa

mujh ko maalum thaa ik roz chalaa jaaegaa!
vo miri umr ko yaadon ke havaale kar ke

kabhi kitaabon mein phuul rakhnaa kabhi darakhton pe naam likhnaa
hamein bhi hai yaad aaj tak vo nazar se harf-e-salaam likhnaa

pichhle janam kaa koi ta'alluq thaa us ke saath
dekhe baghair mujh ko khad-o-khaal yaad the

sajda-gaah-e-barhaman aur shaikh hain dair-o-haram
mai-paraston ke liye buniyaad mai-khaane hue