kirdaar rahnumaa kaa mujhe lag rahaa hai yuun — Nasim Zahid

tujh ko hai naaqidin se nafrat
tere kamre mein aaina kyon hai

uf rahbaron mein aisaa koi raahbar nahin
jis ki nigaah zarre mein khurshid DhunD le

main sabr kar rahaa huun to zaalim hai taa'na-zan
us ko khabar nahin ki khudaa mere saath hai

use daulat kamaane ki havas thi
nazar se ab nazaara ho gai hai

mujhe khabar hai use aisaa dard hai 'zaahid'
jise davaa nahin rishvat sukun deti hai

aai vo rafta rafta taqaddus ki raah tak
phir yuun huaa ki niyyat-e-naaseh bigaD gai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa