is liye chal na sakaa koi bhi khanjar mujh par — Nazeer Baaqri

khuub gae pardes ki apne divaar-o-dar bhuul gae
shish-mahal ne aisaa gheraa miTTi ke ghar bhuul gae

main ne duniyaa chhoD di lekin miraa murda badan
ek uljhan ki tarah qaatil ki nazron mein rahaa

khaDaa huun aaj bhi roTi ke chaar harf liye
savaal ye hai kitaabon ne kyaa diyaa mujh ko

zakhm kitne tiri chaahat se mile hain mujh ko
sochtaa huun ki kahun tujh se magar jaane de

apni aankhon ke samundar mein utar jaane de
teraa mujrim huun mujhe Duub ke mar jaane de

aag duniyaa ki lagaai hui bujh jaaegi
koi aansu mire daaman pe bikhar jaane de

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge