guzar gae hain vo lamhe bhi ishq mein ai dost — Nazish Partap Gadhi

na hogaa raaegaan khun-e-shahidaan-e-vatan hargiz
yahi surkhi banegi ek din unvaan-e-aazaadi

khudaa ai kaash 'naazish' jite-ji vo vaqt bhi laae
ki jab hindostaan kahlaaegaa hindostaan-e-aazaadi

javaano nazr de do apne khun-e-dil kaa har qatra
likhaa jaaegaa hindostaan ko farmaan-e-aazaadi

tah bah tah jamti chali jaati hai sannaaTon ki gard
haal-e-dil sab dekhte hain puchhtaa koi nahin

suno na meri shikasta-e-dili ke afsaane
ki mere saamne toDe gae hain paimaane

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

parvaane aa hi jaaeinge khinch kar ba-jabr-e-ishq
mahfil mein sirf shama jalaane ki der hai

yuun kar rahaa huun un ki mohabbat ke tazkire
jaise ki un se meri baDi rasm-o-raah thi

main de rahaa huun tujhe khud se ikhtilaaf kaa haq
ye ikhtilaaf kaa haq hai mukhaalifat kaa nahin