makin-e-dil ko khaanumaa-kharaabiyon se ishq thaa — Pallav Mishra

hamaaraa kaam to mausam kaa dhyaan karnaa hai
aur us ke baa'd ke sab kaam shash-jahaat ke hain

main ek khaana-ba-dosh huun jis kaa ghar hai duniyaa
so apne kaandhe pe le ke ye ghar bhaTak rahaa huun

main tujh se milne samay se pahle pahunch gayaa thaa
so tere ghar ke qarib aa kar bhaTak rahaa huun

ye tai huaa thaa ki khuub roeinge jab mileinge
ab us ke shaane pe sar hai to hanste jaa rahe hain

ye jism tang hai siine mein bhi lahu kam hai
dil ab vo phuul hai jis mein ki rang-o-bu kam hai

main apni maut se khalvat mein milnaa chaahtaa huun
so meri naav mein bas main huun naakhudaa nahin hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

chand logon ki mohabbat bhi ghanimat hai miyaan
shahr kaa shahr hamaaraa to nahin ho saktaa

bichhaDne kaa iraada hai to mujh se mashvara kar lo
mohabbat mein koi bhi faisla zaati nahin hotaa

maktab-e-ishq kaa dastur niraalaa dekhaa
us ko chhuTTi na mile jis ko sabaq yaad rahe

mujh mein thoDi si jagah bhi nahin nafrat ke liye
main to har vaqt mohabbat se bharaa rahtaa huun