aatish-e-ishq se bachiye ki yahaan ham ne bhi — Quaiser Khalid

ab is tarah bhi rivaayat se inhiraaf na kar
badal agarche tu achchhaa na de, kharaab to de

Daal di pairon mein us shakhs ke zanjir yahaan
vaqt ne jis ko zamaane mein uchhalte dekhaa

ho paae kisi ke ham bhi kahaan yuun koi hamaaraa bhi na huaa
kab Thahri kisi ik par bhi nazar kyaa chiiz hai shahr-e-khubaan bhi

kuchh tu hi bataa aakhir kyun-kar tire bandon par
har shab hai nai aafat har roz musibat hai

mohmal hai na jaanein to, samjhein to vazaahat hai
hai ziist faqat dhokaa aur maut haqiqat hai

baaton se phuul jhaDte the lekin khabar na thi
ik din labon se un ke hi nashtar bhi aaeinge

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

'ishq mein intihaa ki had na hui
'aashiqi teri mustanad na hui

urdu mein baat kijiye urdu mein boliye
haq hai zabaan kaa pyaar kaa ras is mein gholiye

sunte hain ishq naam ke guzre hain ik buzurg
ham log bhi faqir usi silsile ke hain

tamaam vahm o gumaan hai to ham bhi dhoka hain
isi khayaal se duniyaa ko main ne pyaar kiyaa