is bhari duniyaa mein koi bhi hamaaraa na huaa — Rajendera Krishan

log ro ro ke bhi is duniyaa mein ji lete hain
ek ham hain ki hanse bhi to guzaaraa na huaa

ik mohabbat ke sivaa aur na kuchh maangaa thaa
kyaa karein ye bhi zamaane ko gavaaraa na huaa

na jhaTko zulf se paani ye moti TuuT jaaeinge
tumhaaraa kuchh na bigDegaa magar dil TuuT jaaeinge

na chaaraagar ki zarurat na kuchh davaa ki hai
duaa ko haath uThaao ki gham ki raat kaTe

ye naazuk lab hain yaa aapas mein do lipTi hui kaliyaan
zaraa in ko alag kar do tarannum phuuT jaaeinge

hamein vaasta taDap se hamein kaam aansuon se
tujhe yaad kar ke roe yaa tujhe bhulaa ke roe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge