ham os ke qatre hain ki bikhre hue moti — Ram Riyaz

tire intizaar mein is tarah miraa ahad-e-shauq guzar gayaa
sar-e-shaam jaise bisaat-e-dil koi khasta-haal sameT le

jo tere gham mein jale hain vo phir bujhe hi nahin
jab in ki raakh kuredo sharaare zinda hain

zindagi kashmakash-e-vaqt mein guzri apni
din ne jiine na diyaa raat ne marne na diyaa

aansu jo bahein surkh to ho jaati hain aankhein
dil aisaa sulagtaa hai dhuaan tak nahin aataa

zindagi to sapnaa hai kaun 'raam' apnaa hai
kyaa kisi ko dukh denaa kyaa kisi kaa gham karnaa

ab kahaan vo pahli si fursatein mayassar hain
saaraa din safar karnaa saari raat gham karnaa

shauq kitne fareb detaa hai
muskuraa kar hamaaraa naam na le

mauj-e-takhayyul gul kaa tabassum partav-e-shabnam bijli kaa saaya
dhokaa hai dhokaa naam-e-javaani is ko javaani koi na samjhe

miri ghazal mein kisi bevafaa kaa zikr na thaa
na jaane kaise tiraa tazkira nikal aayaa

subh-dam zulfein na yuun bikhraaiye
log dhokaa khaa rahe hain shaam kaa

bevafaa logon mein rahnaa tiri qismat hi sahi
in mein shaamil main tiraa naam na hone dungaa

nazar se duur hain dil se judaa na ham hain na tum
gila karein bhi to kyaa be-vafaa na ham hain na tum