tire nazdik aa kar sochtaa huun — Rasa Chughtai

jin aankhon se mujhe tum dekhte ho
main un aankhon se duniyaa dekhtaa huun

miTTi jab tak nam rahti hai
khushbu taaza-dam rahti hai

aur kuchh yuun huaa ki bachchon ne
chhinaa-jhapTi mein toD Daalaa mujhe

huiin aankhein ajab behaal ab ke
ye baarish kar gai kangaal ab ke

dil dhaDaktaa hai sar-e-raah-e-khayaal
ab ye aavaaz jahaan tak pahunche

hai koi yahaan shahr mein aisaa ki jise main
apnaa na kahun aur vo apnaa mujhe samjhe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

vahaan bhi 'aql hi masnad-nashin mili ki jahaan
mataa'-e-fikr-o-nazar kaa koi savaal na thaa

havaa gum-sum khaDi hai raaste mein
musaafir soch mein Duubaa huaa hai

kis ne sochaa thaa ki khud se mil kar
apni aavaaz se Dar jaanaa hai

fikr jab se ho gai hai jeb bharne ki unhein
ab duaa-e-shaikh ki taasir aadhi rah gai