kuchh be-Thikaana karti rahin hijratein mudaam — Sabir Zafar

duur tak ek khalaa hai so khalaa ke andar
sirf tanhaai ki surat hi nazar aaegi

us se bichhaD ke ek usi kaa haal nahin main jaan sakaa
vaise khabar to har pal mujh tak duniyaa bhar ki aati rahi

ham itnaa chaahte the ek dusre ko 'zafar'
main us ki aur vo meri misaal ho ke rahaa

apni yaadein us se vaapas maang kar
main ne apne-aap ko yakjaa kiyaa

main aise jamghaTe mein kho gayaa huun
jahaan mere sivaa koi nahin hai

har shakhs bichhaD chukaa hai mujh se
kyaa jaaniye kis ko DhunDhtaa huun

hai ek hi lamha jo kahin vasl kahin hijr
taklif kisi ke liye aaraam kisi kaa

kabhi khushbu kabhi saaya kabhi paikar ban kar
sabhi hijron mein visaalon mein mire paas raho

hijr kuchh is tarah ataa ho mujhe
meraa jis mein visaal ho jaae

hijr ke chhoTe gaanv se ham ne shahr-e-vasl ko hijrat ki
shahr-e-vasl ne niind uDaa kar khvaabon ko paamaal kiyaa

haakim-e-shahr ki khvaahish ki hukumat ki jaae
varna haalaat to aise hain ki hijrat ki jaae

is liye saanp mujhe DhunD rahe hain pyaare
main mahaktaa huun tire hijr mein sandal ho kar