hai ek hi lamha jo kahin vasl kahin hijr — Ain Tabish

main apnaa kaar-e-vafaa aazmaaungaa phir bhi
kahaan main tere sitam yaad karne vaalaa huun

tu jo is duniyaa ki khaatir apnaa-aap ganvaataa hai
ai dil-e-man ai mere musaafir kaam hai ye naa-daanon kaa

be-hunar dekh na sakte the magar dekhne aa.e
dekh sakte the magar ahl-e-hunar dekh na paa.e

jahaan na apne azizon ki diid hoti hai
zamin-e-hijr pe bhi koi iid hoti hai

ji lagaa rakkhaa hai yuun taabir ke auhaam se
zindagi kyaa hai miyaan bas ek ghar khvaabon kaa hai

ek basti thi hui vaqt ke andoh mein gum
chaahne vaale bahut apne puraane the udhar

zakhmon ko phuul kar de tanhaaiyon ko marham
sau qurbaton pe bhaari hijrat kaa ek mausam

miri hatheli pe jo hijr ki lakirein hain
tire visaal se har vaqt rokti hain mujhe

abhi to ek vatan chhoD kar hi nikle hain
hanuz dekhni baaqi hain hijratein kyaa kyaa

tu to mahlon mein rahti hai ye tujh ko maa'lum nahin
sahraaon mein main bhaTkaa huun hijr ki vahshat mujh se puchh

khvaab ke jaisaa na paayaa khvaab ki taa'bir se
dard vahshat hijr sahraa hi milaa taqdir se

hijr ki raat ye har Dubte taare ne kahaa
ham na kahte the na aaeinge vo aae to nahin