vaqt ke saath 'sadaa' badle ta'alluq kitne — Sada Ambalvi

zikr meraa aaegaa mahfil mein jab jab dosto
ro paDeinge yaad kar ke yaar sab yaari miri

vaqt har zakhm kaa marham to nahin ban saktaa
dard kuchh hote hain taa-umr rulaane vaale

bujh gai shama ki lau tere dupaTTe se to kyaa
apni muskaan se mahfil ko munavvar kar de

apni urdu to mohabbat ki zabaan thi pyaare
uff siyaasat ne use joD diyaa mazhab se

kyuun sadaa pahne vo teraa hi pasandida libaas
kuchh to mausam ke mutaabiq bhi sanvarnaa hai use

kitnaa sochaa thaa dil lagaaeinge
sochte sochte hayaat hui

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

sukhan raaz-e-nashaat-o-gham kaa parda ho hi jaataa hai
ghazal kah lein to ji kaa bojh halkaa ho hi jaataa hai

uljhi thi jin mein ek zamaane se zindagi
kyuun ai gham-e-hayaat vo gesu sanvar gae

hain hamaare jitne leader sabhi bhuTTe chor kyon hain
koi chaara-saaz hotaa koi gham-gusaar hotaa