us ke jazbaat se yuun khel rahaa huun 'saaghar' — Saghar Azmi

shohrat ki fazaaon mein itnaa na uDo 'saaghar'
parvaaz na kho jaae in unchi uDaanon mein

shaam Dhale ye soch ke baiThe ham apni tasvir ke paas
saari ghazlein baiThi hongi apne apne miir ke paas

tum kyaa jaano apne aap se kitnaa main sharminda huun
chhuT gayaa hai saath tumhaaraa aur abhi tak zinda huun

kashmir ki vaadi mein be-parda jo nikle ho
kyaa aag lagaaoge barfili chaTaanon mein

tum se milti-julti main aavaaz kahaan se laaungaa
taaj-mahal ban jaae agar mumtaaz kahaan se laaungaa

itnaa naaraaz ho kyuun us ne jo patthar pheinkaa
us ke haathon se kabhi phuul bhi aayaa hogaa

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

nai nahin hai ye tanhaai mere hujre ki
maraz ho koi bhi hai chaaraagar se Dar jaanaa

giraa thaa bojh koi sar se mere
usi ko phir uThaanaa chaahtaa huun

miraa aanaa jahaan mein munhasir thaa tiin baaton par
jafaa sahnaa vafaa karnaa aur us ke baad mar jaanaa