itnaa naaraaz ho kyuun us ne jo patthar pheinkaa — Saghar Azmi

shohrat ki fazaaon mein itnaa na uDo 'saaghar'
parvaaz na kho jaae in unchi uDaanon mein

shaam Dhale ye soch ke baiThe ham apni tasvir ke paas
saari ghazlein baiThi hongi apne apne miir ke paas

tum kyaa jaano apne aap se kitnaa main sharminda huun
chhuT gayaa hai saath tumhaaraa aur abhi tak zinda huun

kashmir ki vaadi mein be-parda jo nikle ho
kyaa aag lagaaoge barfili chaTaanon mein

tum se milti-julti main aavaaz kahaan se laaungaa
taaj-mahal ban jaae agar mumtaaz kahaan se laaungaa

devtaa mere aangan mein utreinge kab zindagi bhar yahi sochtaa rah gayaa
mere bachchon ne to chaand ko chhu liyaa aur main chaand ko pujtaa rah gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

gul kiyaa jis ne vo thaa aur magar
shama ne shikva havaaon se kiyaa

gulaabon ke honTon pe lab rakh rahaa huun
use der tak sochnaa chaahtaa huun

ai parindo yaad karti hai tumhein paagal havaa
roz ik nauha sar-e-shaakh shajar suntaa huun main