ishq adab hai to apne aap aae — Sarfraz Nawaz

tumhaare sach ki hifaazat mein yuun huaa akasr
ki apne-aap ko jhuTaa banaa liyaa main ne

be-sadaa si kisi aavaaz ke pichhe pichhe
chalte chalte main bahut duur nikal jaataa huun

khudaa kare ki vahi baat us ke dil mein ho
jo baat kahne ki himmat juTaa rahaa huun main

safar kahaan se kahaan tak pahunch gayaa meraa
ruke jo paanv to kaandhon pe jaa rahaa huun main

mire baghair koi tum ko DhunDtaa kaise
tumhein pata hai tumhaaraa pata rahaa huun main

vo koi aam saa hi jumla thaa
tere munh se buraa lagaa mujh ko

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

dil-e-muztar vafaa ke baab mein ye jald-baazi kyaa
zaraa ruk jaaein aur dekhein natija kyaa nikaltaa hai

isi liye hamein ehsaas-e-jurm hai shaayad
abhi hamaari mohabbat nai nai hai naa

main to apni jaan pe khel ke pyaar ki baazi jiit gayaa
qaatil haar gae jo ab tak khuun ke chhinTe dhote hain

itnaa bhi naa-umid dil-e-kam-nazar na ho
mumkin nahin ki shaam-e-alam ki sahar na ho