khudaa kare ki vahi baat us ke dil mein ho — Sarfraz Nawaz

tumhaare sach ki hifaazat mein yuun huaa akasr
ki apne-aap ko jhuTaa banaa liyaa main ne

ishq adab hai to apne aap aae
gar sabaq hai to phir paDhaa mujh ko

be-sadaa si kisi aavaaz ke pichhe pichhe
chalte chalte main bahut duur nikal jaataa huun

safar kahaan se kahaan tak pahunch gayaa meraa
ruke jo paanv to kaandhon pe jaa rahaa huun main

mire baghair koi tum ko DhunDtaa kaise
tumhein pata hai tumhaaraa pata rahaa huun main

vo koi aam saa hi jumla thaa
tere munh se buraa lagaa mujh ko

ai mohabbat mujh ko aisaa hausla khairaat kar
us ko baazu se pakaD kar kah sakun ki baat kar

hausla sab ne baDhaayaa hai mire munsif kaa
tum bhi inaam koi meri sazaa par likh do

himmat-e-tark-e-vafaa Duub gai
kis ne aankhon mein utaaraa dariyaa

ye jazba-e-talab to miraa mar na jaaegaa
tum bhi agar miloge to ji bhar na jaaegaa

thi hausle ki baat zamaane mein zindagi
qadmon kaa faasla bhi yahaan ek jast thaa

nikal ke khuld se un ko mili khilaafat-e-arz
nikaale jaane ki tohmat hamaare sar aai