mire hi ghar mein rahnaa chaahti hai — Sayyed Riyaz Raheem

nazar rakhte hain us ki har adaa par
ba-zaahir be-khabar hote hue bhi

hamaare 'ahd mein kyon jahl kaa hai rutba buland
shikast khaai hui aagahi savaal uThaa

ajiib khauf kaa aalam hai apne chaaron taraf
safar mein lagtaa hai ye aakhiri safar to nahin

har subh nikalte hain yahi soch ke ghar se
bikhri hui duniyaa ko sameTeinge kisi din

ab aur kyaa kahun main mohabbat ke baab mein
main un ke saath huun jo mohabbat ke saath hain

kitnaa dushvaar lag rahaa thaa safar
dekho ham aa gae vahaan se yahaan

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

naa-shanaasaan-e-mohabbat kaa gila kyaa ki yahaan
ajnabi vo hain ki thi jin se shanaasaai bhi

ik-aadh baar to jaan vaarni hi paDti hai
mohabbatein hon to bantaa nahin bahaana koi