ik-aadh baar to jaan vaarni hi paDti hai — Sabir Zafar

duur tak ek khalaa hai so khalaa ke andar
sirf tanhaai ki surat hi nazar aaegi

us se bichhaD ke ek usi kaa haal nahin main jaan sakaa
vaise khabar to har pal mujh tak duniyaa bhar ki aati rahi

ham itnaa chaahte the ek dusre ko 'zafar'
main us ki aur vo meri misaal ho ke rahaa

apni yaadein us se vaapas maang kar
main ne apne-aap ko yakjaa kiyaa

main aise jamghaTe mein kho gayaa huun
jahaan mere sivaa koi nahin hai

har shakhs bichhaD chukaa hai mujh se
kyaa jaaniye kis ko DhunDhtaa huun

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

hairat se tak rahaa hai jahaan-e-vafaa mujhe
tum ne banaa diyaa hai mohabbat mein kyaa mujhe

aaghaaz-e-mohabbat se anjaam-e-mohabbat tak
''ik aag kaa dariyaa hai aur Duub ke jaanaa hai''

ishq imaan donon mein tafriq hai
par inhin donon pe meraa imaan hai