aarzu ki be-hisi kaa gar yahi aalam rahaa — Shahzad Ahmad

zabaanein thak chukin patthar hue kaan
kahaani an-kahi thi an-kahi hai

shaayad isi baais huiin patthar miri aankhein
jo kuchh ki mujhe dekhnaa thaa dekh liyaa hai

khalq be-parvaa khudaa bandon se tang aayaa huaa
main akelaa phir rahaa huun hashr ke maidaan mein

ek se manzar dekh dekh kar aankhein dukhne lagti hain
is raste par peD bahut hain aur haraa koi bhi nahin

main sun rahaa huun magar dusron ko kaise sunaaun
jo giit gunjtaa rahtaa hai mere kaanon mein

bharpur nahin hain kisi chehre ke khad-o-khaal
dekhaa nahin vo chaand jo puuraa nazar aae

jhaankte raat ke garebaan se
ham ne sau aaftaab dekhe hain

raushni ho rahi hai kuchh mahsus
kyaa shab aakhir tamaam ko pahunchi

shor din ko nahin sone detaa
shab ko sannaaTaa jagaa detaa hai

us ko sochun to dhyaan mein mere
khushbu aati hai pahli baarish ki

naqd-e-dil-e-khaalis kuun miri qalb tuun mat jaan
hai tujh kuun agar shubh to kas dekh tapaa dekh

shikva-e-zulmat-e-shab se to kahin behtar thaa
apne hisse ki koi shama jalaate jaate