ghar ke divaar-o-dar pe shaam hi se — Shakeel Azmi

tumhaari maut ne maaraa hai jite-ji ham ko
hamaari jaan bhi goyaa tumhaari jaan mein thi

kuchh dinon ke liye manzar se agar haT jaao
zindagi bhar ki shanaasaai chali jaati hai

isi khataa pe bujhaae gae charaagh mire
main jaantaa thaa bahut kuchh havaa ke baare mein

haar ho jaati hai jab maan liyaa jaataa hai
jiit tab hoti hai jab Thaan liyaa jaataa hai

apni manzil pe pahunchnaa bhi khaDe rahnaa bhi
kitnaa mushkil hai baDe ho ke baDe rahnaa bhi

mujh ko bikhraayaa gayaa aur sameTaa bhi gayaa
jaane ab kyaa miri miTTi se khudaa chaahtaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

maarka garm to ho lene do khun-rezi kaa
pahle shamshir ke niche hamin jaa baiTheinge

na mohtasib ki khushaamad na mai-kade kaa tavaaf
khudi mein mast huun apni bahaar mein gum huun

har ashk-e-surkh hai daamaan-e-shab mein aag kaa phuul
baghair shama ke bhi jal rahe hain parvaane

tujhe manaaun ki apni anaa ki baat sunun
ulajh rahaa hai mire faislon kaa resham phir