apni manzil pe pahunchnaa bhi khaDe rahnaa bhi — Shakeel Azmi

tumhaari maut ne maaraa hai jite-ji ham ko
hamaari jaan bhi goyaa tumhaari jaan mein thi

kuchh dinon ke liye manzar se agar haT jaao
zindagi bhar ki shanaasaai chali jaati hai

isi khataa pe bujhaae gae charaagh mire
main jaantaa thaa bahut kuchh havaa ke baare mein

ghar ke divaar-o-dar pe shaam hi se
nazm likhtaa huaa hai sannaaTaa

haar ho jaati hai jab maan liyaa jaataa hai
jiit tab hoti hai jab Thaan liyaa jaataa hai

mujh ko bikhraayaa gayaa aur sameTaa bhi gayaa
jaane ab kyaa miri miTTi se khudaa chaahtaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

yuun to maujud apne ghar mein hai
aadmi mustaqil safar mein hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai